Trii ann de bridge alla Pecetta

Carlin... el detto el dis: “gh'è minga duu senza trii”,
trii come trii ann che alla Pecetta giùghi al bridge al lunedì,
trii come trii scritt che hoo trà giò sù 'stò gioeùgh e per cuntà sù
cosa hoo imparaa, anca se la “marescialla” l'ha dii che l'è mej che vada a dà via el cuu,
invece hoo miss in del coo che la briscola del trii sett, in del bridge la se ciama atout,
l'è che forse sont on “aquila” o l'è domà in del bridge? s'ten diset Carlin?
e sì che in tucc i gioeùgh de cart voo minga nanca tanto mal,
giùghi ben in del trii sett, in de la scòpa specialment quella d'ass,
o l'è forse perchè hinn gioeùgh popolar, e el bridge invece l'è anmò per l'alta class?
mah! mì però insisti a dispètt de la “marescialla” e dell'Oberto ”ragionàtt”.
La mia scommessa l'è cont alter trii che me dann semper 'dòss,
de quell che me disen el memorizzi e guardi nò tusscòss,
sù tucc metti quella che l'è semper pussee infolarmada per fà la miglior giùgada,
l'accetti perchè l'è carina ma quand la va con mì in fibrillazion,
l'è 'me on “serpent” la diventa rossa però l'è bell vedè el moviment del sò...”balcon”.


L'alter anmò l'è on'alter “oeùv de Pasqua” di vòlt me sòci, de nòmm Luis,
cantant in del coro de l'opera lirica, generos in del regalà i cart del bridge,
l'è staa bon 'stò brutt ghirba, in d'ona giùgada dubbia damm del...“pirla”,
ma la vendetta l'è mai mòrta e mì in d'ona giùgada soa stòrta, gh'hoo daa del bròcc,
“vegn giò dalla pianta che la guerra l'è finida lifròcch”, l'ha incassaa l'ha dì nagòtt.
On'alter l'è el “brascin cort”, cont i sò giùgad stran l'è quasi semper vincidor,
el voeùr semper vegg reson, semper el mètt el bècch in tucc i inghìpp in tucc i occasion,
On cènn particolar perchè la tegn da la mia part, el va alla brava e simpatica Fernanda,
“chi lo fa l'aspetta” donca dagg minga tròpp 'dòss al tò marii s'el fà ona giùgada blanda,
de corsa saludi con simpatia tucc i dònn cont on basin Carlin, già che la Wanda,
l'è “mei” come ballerina che...in Sardegna l'hoo vista 'me la dimenava el cuu... in pista.
La finissi chì gh'hoo pù de favella me auguri però, che la moral de la Livella del Totò,
tucc la tegnen in de la ment e quest el speri verament, come l'è staa verament incoeù
l'ultima giùgada de st'ann, adess semm sòtta i fest de Natal ghii de perdonamm de 'sti ball,
allora me resta domà de fà a tutta la compagnia trii auguri con tanta simpatia,
ch'el sia per tucc on bon Natal e per el noeùv ann on ann senza malann,
quest l'è l'auguri faa con semplicità e sincerità dal Biaggi de...Milan!


Carlo Biaggi

Milan 16 Dicember 2013